Fyrirlestrar Miðaldastofu 2016–2017

Guðrún Ingólfsdóttir

„Fögur þykir mér hönd þín“

Skrifkúnst kvenna fyrr á tíð

Þriðjudaginn 1. nóvember 2016 kl. 16.30
Lögbergi 101

gudrun-ingolfsdottir
Guðrún Ingólfsdóttir

Í fyrirlestrinum verður fjallað um bókmenningu kvenna á fyrri öldum, bækur sem konur lásu, bækur sem konur áttu og bækur sem konur skrifuðu. Lengi framan af stóð konum ekki til boða að verma skólabekk. Lærðu þær þrátt fyrir það að lesa og skrifa? Hvað segja sögulegar heimildir? Má finna spor eftir konur á spássíum handrita? Skrifuðu þær handrit? Þjálfaðan skrifara þurfti til slíks, voru þær færar um að skrifa bréf? Hafi konur mundað fjöðurstafinn, hvaða tilgangi þjónaði þá ritfærni þeirra? Í fyrirlestrinum fæst nasasjón af efni nýútkominnar bókar, Á hverju liggja ekki vorar göfugu kellíngar. Bókmenning íslenskra kvenna frá miðöldum fram á 18. öld.

Guðrún Ingólfsdóttir Ph.D. er sjálfstætt starfandi fræðimaður með aðsetur á Stofnun Árna Magnússonar í íslenskum fræðum. Guðrún hefur einkum fengist við rannsóknir á handritamenningu, miðaldabókmenntum og bókmenntum 18. aldar. Bók hennar, Á hverju liggja ekki vorar göfugu kellíngar. Bókmenning íslenskra kvenna frá miðöldum fram á 18. öld, kemur út hjá Háskólaútgáfunni nú í október.

Fyrirlesturinn verður fluttur á íslensku og er öllum opinn.