Landnám Íslands

skaftafell-eyrarros

Fyrirlestraröð Miðaldastofu Háskóla Íslands 2014–2015

Miðaldastofa Háskóla Íslands boðar til fyrirlestraraðar næstkomandi vetur (2014–2015) um landnám Íslands. Óskað er eftir fræðilegum fyrirlestrum á sem flestum fræðasviðum (bókmenntafræði, fornleifafræði, mannfræði, málfræði, sagnfræði, minnisfræði, þjóðfræði, örnefnafræði, náttúrufræði og erfðafræði, svo nokkur séu nefnd) um nýjar rannsóknir á landnámi Íslands.

Meðal umfjöllunarefna mætti nefna rannsóknir á ólíkum heimildum um landnám (svo sem fornleifum, rituðum heimildum, örnefnum og erfðaefni manna og dýra), á uppruna og sögu þeirra sem hér námu land, áhrifum þeirra á land, gróður og vistkerfi, rannsóknir á máli og menningu og ýmsum hliðum þess samfélags sem til varð í nýju landi, ef til vill með samanburði við landnám annars staðar við Norður-Atlantshaf og víðar um heim. Markmiðið er að fá þverfaglegt yfirlit yfir helstu nýjungar í rannsóknum á þessu viðfangsefni og er stefnt að því að gefa fyrirlestrana út á bók í ritrýndri útgáfu.

Fyrirlestrahaldið verður með svipuðu sniði og verið hefur á vegum Miðaldastofu. Gert er ráð fyrir 35–40 mínútna löngum fyrirlestrum (á íslensku eða ensku) til flutnings síðdegis (venjulega á fimmtudegi kl. 16.30 í Árnagarði eða annars staðar á háskólasvæðinu) og verður þeim dreift yfir veturinn.

Áhugasamir sendi Haraldi Bernharðssyni (haraldr@hi.is) titil og 250 orða efniságrip eigi síðar en 1. ágúst 2014.