Fyrirlestrar Miðaldastofu

Ármann Jakobsson

Að sjá tröll

Um yfirnáttúrulegar skynjanir á miðöldum

Fimmtudaginn 19. október 2017 kl. 16.30
Lögbergi 101

Ármann Jakobsson

The Troll Inside You: Paranormal Activity in the Medieval North kom út í sumar hjá Punctum-forlaginu í Bandaríkjunum sem einkum sérhæfir sig í ritum undir áhrifum póstmódernisma. Í bókinni er fengist við rammann utan um hugmyndir og rannsóknir á yfirnáttúrulegum verum og atburðum með íslenska frásagnartexta á miðöldum sem þungamiðju. Þannig er meginefnið hin yfirnáttúrulega reynsla, hvernig henni er komið í orð og tengsl hennar við aðra þætti samfélagsins, þ.e. hvernig tröllskapur er vitnisburður um hvers konar samfélagslegan núning og vandamál. Í erindinu mun höfundurinn kynna þetta verk, rannsóknina sem það grundvallast á og forsendur verksins. Eins mun hann ræða hugmyndafræði verksins og gildi hinnar hugvísindalegu nálgunar þar sem verkið er öðrum þræði í viðræðu við langa rannsóknarhefð tengd þjóðfræðilegum efnum og yfirnáttúrulegri reynslu.

Ármann Jakobsson er prófessor í íslenskum bókmenntum fyrri alda við Háskóla Íslands. Hann hefur áður gefið út bækurnar Illa fenginn mjöður (2009), Nine Saga Studies (2013) og A Sense of Belonging (2014) og ritstýrt The Routledge Research Companion to the Medieval Icelandic Sagas (2017).

Fyrirlesturinn verður fluttur á íslensku og er öllum opinn.