Gunnar Harðarson

Fingraför spekinnar: Kaflar úr sögu íslenskrar heimspeki á miðöldum

Framsaga og umræður

Miðvikudaginn 11. desember 2024 kl. 16.30 / Wednesday, December 11, 2024, at 16.30
Fyrirlestrasal Eddu / Edda auditorium

Síðsumars kom út bókin Fingraför spekinnar: Kaflar úr sögu íslenskrar heimspeki á miðöldum þar sem rakin eru spor eftir heimspekilega hugsun í miðaldaritum Íslendinga. Rannsóknin leiðir í ljós hugmyndir um heimspeki, beitingu heimspekilegra hugtaka og rökfærslur af heimspekilegum toga. Meðal annars er gerð tilraun til að skilja og túlka þá mynd af heimspekinni sem sjá má teiknaða í handritinu GKS 1812 4to, en einnig er rýnt í heimspekileg og siðfræðileg hugtök í Hómilíubókinni og Hávamálum, sem reynast vera gerólík. Þá eru heimspekilegar rökfærslur í formála Snorra-Eddu brotnar til mergjar og fyrri sjónarmið endurskoðuð. Jafnframt er gerð grein fyrir því með hvaða hætti alfræðileg hugsun birtist í handritum á borð við Hauksbók, þrátt fyrir að ekki sé hægt að kalla slík handrit alfræðirit, og þau sett í samband við lögmannsstarfið. Í lok bókarinnar er síðan gefið yfirlit um rannsóknir á siðfræði Íslendingasagna.

Höfundur flytur framsögu um efni bókarinnar en síðan munu tveir viðmælendur, Salvör Nordal og Hjalti Snær Ægisson, bregðast við og eftir það verða almennar umræður.

Gunnar Harðarson er prófessor emeritus við Háskóla Íslands. Hann lauk á sínum tíma doktorsprófi í heimspekisögu frá Panthéon-Sorbonne háskólanum í París og hefur einkum kennt námskeið á sviði heimspekisögu og listheimspeki og jafnframt stundað rannsóknir á sögu heimspekinnar á Íslandi.

Fyrirlesturinn fer fram á íslensku og er öllum opinn. / The talk will be conducted in Icelandic and is open to all.

Fyrirlesturinn er haldinn í samstarfi við Heimspekistofnun Háskóla Íslands

—o—o—o—